Wext: Sunday, 02.March. @ 00:00:00 CET

Mijar:

Dr. FELAT DILGEŞ

STENBOL, 1/3 2003 — Miletê kurd di berbanga Lozaneke nû de ye. Em di demeke gelek hesas a dîrokî re derbas dibin. Van rojan, tu miletperwerek kurd, tu welatparêzek kezebşewitî, tu dilxwazek dilovan, tu mirovek kurd ê ko bi qasî misqalekî heskirina wî ji gel û welatê wî re heye, nikare bi rihetî serê xwe deyne ser balîfê û di xew re here.
Dem ne dema razanê ye. Em nikarin razin, çimkî em li ber mesûliyeteke pirr giran in. Em nikarin di xew de herin, çimkî ev paşeroja zarokên me, qedera welatê me, mesela me ya hebûn û nebûnê ye. Ji bo ko em cardin nekevin xefika dijmin, ji bo ko em cardin neyên xapandin, ji bo ko em kurdbûn û kûrdîtiyê bi saxî nekin gorê û çend sal bi şûn de, li serê xwe nexin û şînê negirin divê em hişyar bin, hayjixweheyî amade û li ser kar bin. Vê carê divê em destûrê nedin ko nelet li pey me were barandin.

Dijminên me, li nav çavê me hemûyan dinihêrin û banga Lozaneke nû dikin. Bi gotina Heraklîtos, “Mirov nikare du caran xwe di avekê de bişo”, lê dijminên me dixwazin ko heft caran me di avekê de bişon, bi xewa xefletê di xew re kin. Lozana pêşîn em bi çîrokên biratî û misilmanîyê xapandin. Belê vê carê, ji nava xwe têr, bi hirhopî, bi çavsorî, bi gefxwarin, bi destdirêjî, bi bêşermî û bêedebî dertên pêşberî me û ji me re dibêjin, “Eger hûn mêr in, eger ji we tê, eger bi we dibe em bejn û bala we bibînin. Di deftera me de jiyan ji kurd û kurdbûnê re tune. An hûnê her û her kole û dîlê ber destê me bin, an hûnê di bin erdê de tune bin!” Dijminên me yên bêşerm weha dibêjin.

Baş e kîjan e ev dijmin? Malneketno hûn nizanin? Ev dijmin ew e ko piraniya axa welatê me di dest de ye. Ev dijmin ew e ko ji bîst milyon zêdetir kurdî xesandiye û kiriye ko tu dengekî xurt ê ji bo welatekî azad û serbixwe ji wan dernekeve. Yanî vî dijminê har ê ko nufûsa herî mezin a kurd û perçê herî mezin ê welatê me dabilandiye, niha dixwaze êrîşî başûrê welatê me jî bike û vê derê jî dabilîne.

Wusa bi bêedebî û wusa bi çavsorî rabûye ser lingan ko ji girêza devê wî der û dor dihetike.

Ev dijimin berê weha nebû. Wusa bi hirhopî û bêpîrî bi ser me de nedihat. Gava ko êrîşî hinekan ji me dikir, bi awayekî yan birayên me yên din dixapand û yan jî serê wan miz dida, da ko bi rihetî yê ko ji bo xwe kiriye hedef daqurtîne. Lê vê carê firîqet û bêminet xuya ye. Çimkî em ji hev tar û mar kirine. Evên me yên ko do doza welatekî serbixwe û yekbûyî dikirin, îro me û xwe bi çîroka komareke demokratîk dixapînin û serî bi Emerîka xera kirine. Ew komara demokratîk a ko wê bi ûjdana leşkerên tirk be. Wê ûjdana ko bi binaxkirina 20 milyon kurdên bakur têr nebû û îro bi hovîtî êrîşî başûr dike.

Camêr, darê xwe yê zorê daye ser pişta xwe, tang û topa xwe daye pêşiya xwe, di ser me bîst milyon kurdî de derbas dibe û dibê ezê herim mala 3–4 milyon kurdên ko ne di bin talan û dagirkeriya min de ne û niyeta wan a azadbûnê heye bi serê wan de xera kim.

Tu deng û his ji me dernakeve. Dengekî ko ewê hov û talankaran veciniqîne û wan bi ser hişê wan de bîne, ji me kurdên bakur dernakeve. Hinekên me yên ko serê xwe bi Emerîka xera kirine, li rû çepgir û sosyalîstên tirk ên ko di bin posterên Sedam û ala Iraqê de dimeşin, beşdarî xwepêşandanên li hember şer dibin. Xwedawo tu aqil bidî! Ya sitar, ya hawar! Ma parastina xwînxwarên wek Sedam bi me kurdan ketiye!

Dijminên me bi devê xwe dibêjin ko em di pêvajoya Lozaneke nû de derbas dibin, belê hê jî hinek xewarokên me hişyar nabin, bi ser hişê xwe ve nayên.

Divê em hemû baş bizanibin ko gava dewleta tirk bikeve başûr, heta kurdîtî û kurdbûnê, wek vir li wê derê jî bi tevahî neke bin axê cardin dernakeve. Çimkî ev devlet sî sal e ko di Qibrisê de ye û bi tu awayî niyeta wê tune ko jê derkeve.

Xerakirina hesabê dewleta tirk di destê kurdên bakur de ye. Gava ko kurdên bakur, vê dagirkeriyê qebûl nekin û bi serbilindî li hember derkevin, ev dewlet, nikare xwe tev bide. Lê gava ko kurdên bakur xwe li hember vê dagirkeriyê bitewînin, xwe li bêxîretîyê deynin, hingê ji xwe ewê dijminên me bi ya xwe bikin.

Divê kurdên bakur baş bizanibin ko eger ne ji wan be, wê kurdên başur di nav çend salan de bi tevahî azad bibin. Dijmin bi xwe jî weha dibêje. Nexwe wusa ye, me dev ji azadiya xwe berda be jî, werin em ji xelasbûna birayên xwe re nebin asteng.

Ji bo ko em pêşî li vê destdirêjî û çavsoriyê bigirin, werin em xwe li pêş birayê xwe yê biçûk bikin mertal û nehêlin ko destê dijmin bigijê. Huqûqa biratiyê vê berpirsiyariyê dixwaze.

Pûçkirina vê Lozana duwemîn di destê me de ye. Kurdino, roj roja hawarê, roj roja destrakirinê ye. Bi kê çi dibe, divê di texma xwe de bike. Yê ko qet tiştekî pê nabe, bila ji pêşmergeyên canfîda re dua bike. Ketina Dihok, Hewlêr û Silmaniyê, mirina Wan, Dêrsim û Diyarbekirê ye.