PDK - XOYBUN
Tunel*   Tunel*Dengê wêbi sîmfoniya dengê Arifê Cezîrî re harmonî dibe.. Silava rojê bi tayên tîrêjan re gurzan tînin holê li ser sêla dilê xwe nanekî dipêje.. Navekî, şehekî û çavekî ji wan pêlên rewrewkan re qeyikê li razên roniyê li tabloyeke ciwan nexşîn dike… Lava xaka tî. ji baranê hêsran dibarîne bigirî baranê bigirî .. nimêja derwêşan berzûrî kaniya çavan e; pîvongê ji bin girê bêjeyan hildike… Destarê behitînê li ber çira şevan digerîne.. li newalên hevokan bi şîş û xişta xocan nikildanê dike.. li bin hemû tilmên axa sar xewnên gorên komel tarmarî dike.. li bin berfa peyvan diveşêre.. Ev çi helwest e, çi mebest e tu bûyî rû reş û tu bûyî newêrek şeva kirîstalî te nivêja bê hêvî dikir.. te xweliya asîmanê bê ber û pal bi ser çira şermîn de werdikir.. weyla li te dunyayê ji şima û qişûfê zertir, tu tinazên xwe zerikî dikî, ji rewanê firyayî bêtir, ji firiştan zûtir û ji bihna bayî nûtir tu bihna rewan î, tu dilê firiştan î û tu xencer û pêla bayî tu jî gunehên çavan giran dikî ji sûra kovanê libên kenê jêhatî berhev dikî.. Va bi bihna Zeyzefûnan, tu mukur hatî bi bihna Endeko tu li min ewle bûyî û bi Kovika axînî* silavên Pilo-pilo* li ser serê tayên Gelale pelikên jîndayî diyar dike Ez jî li te mukir têm, paçekî sipî strana dayika min e buhara keçînî parasta peyiva min e.. Bi çemê şahiya min tirêna dilêrî û hogiriyê dimeşe... Ji bo te dilê min li ser têtîkan dikene.. carek hêviya pencera dîl û dîn zindî kir...!! dîmena sîsirkê li ser rûyê şevistana kal şevên tofanan mukurvanên pêçekên mendalan li ber firtona (Tisonamî)* giryana şahiya derbider wek fotoya (Gornika) li ber periya Pikaso, li bin kenê potîna Naziyan dikele...!! Weke durvê te murala jiyê gulekê erê-na ya ken û girî bi hev re cot dike.. Davinşî zû ji bersivên Monalîza reviya ez bi ez re gêj kir; tu bi tu re nakokî, navbilî û bayê her alî li hevdu xist, ne tirş û şor tekez pûç û xav û kelê kir… Erê ez xerîb im; kor im lê ji pirsa çavên te min xwe ava kir… ji sîtava pîr ling ji xêza terpilînê derbûn.. hela li wan sozan ez binêrim çawan dê ji qulê dîwaran der bibin!!?? An ji tabloya xwekujînê çawa direvin? te kenê hinara tirş li bin tepiskên hejmara rojên dijwar pejiqand. sîstem tev li hev bû sînaryo ya dubarekirî ta bi bihinên sport çikand.. te kêlên sînorên bê tirazû daçikandin. te "kefenên" çavsor li ser tilmên tixûban bi destên Izrayîlan livandin… Ji te bîr û bawerî Peye û Keye te ew hêlandin, dawiya tunelê tarî ji zelaliyê di-ingire!! Sînaryo ya dubarekirî hilmekê ji te distîne, destê qelew omîda nerînê nikare bitevizîne..!! hêla pira rêzê li bahoza qerwelê şikest. Êdî li ser banê destpelînê Şeşrenga xwe danî.. Cil û berg ji ber serma diyalokê dipoşîne, dil bi paçên aramê li dawiya tunelê tarî ji zelaliyê her di-ingire lê çi bikim tunel bi dawî nabe? 05. 01. 2005 Tunel : Rêkên windabûnê Kovik : mastêrk, a ko mast an şîr an avê pê dixin meşkê Pilo - pilo : kurmike, li binê kovikek ji axê ew çêdike xwe diveşêre Tisonamî : dema xak li bin derya diheje û pêlan li ser riwê avê bilind û bi hêz dike, peravan di bin de winda dike.. ewê hingê navê Tisonamî lê dibe.. Gornika : Tabloya Hunermendê cîhanî Pîkaso ye Rojavayê Kurdistan Helbesta Ji Pirtuka Pejal Dema weşana helbestê, 04 02. 2007 Ezîz Xemcivînhttp://www.pdk-xoybun.com |
