PARTIYA DEMOKRAT´A KURDISTAN - XOYBUN

PDK - XOYBUN

Beyanî siyasî Kongrey opozîsyonî Êraq le Lenden Amadekar: Arif Zêrevan Serkanî û werger: Brayetî ------------------------- Be nawî Xway gewre û mîhreban Beyanî siyasî Kongrey opozîsyonî Êraqî 14–16 kanunî-yekemî 2002 Be hoy deselatî dasepawî rijêmî dîktatorî regezperistî tayfî û reftare serkutkar û îrhabîyekanî û serkêşî û şerre nawxoyî û derekîyekanî ew rijêmewe, Êraq ziyatir le sî sallî mêjûy siyasî hawçerxî xoy be xiraptirîn şêwe be ser bird. Be dirêjayî ew maweye, gelî Êraq le xebat da bû, zincîreyek hewllî biwêraney da bo kotayîhênan bew hallete naasayiyey ke rijêmî serkutker be ser gelekeman da sepandûyetî, kertêkî firawanî rolle beşerefekanî hêze çekdarekan û layene siyasîy û mîlliyekanî hemû netewe û ayîn û aynzakan lew bergirî û hewille meşrwe da be hemû şêwazêk beşdarîyan kird le waneş xebatî çekdarî ke le raperrîne pîrozekey azarî 1991 da geyişte lutke û tiyayda milyoneha êraqî be medenî û eskerî û be ereb û kurd û turkman û aşûrî û be şî‘e û sunnewe beşdarîyan kird û hêndey nemabû rijêm bigeynne ew çarenûsey şayisteyetî, egerçî qurbanî û xwênêkî zor fîda kira lew pênawe da belam helûmercêkî beder le îradey gele xoragirekeman neyhêşt ew awatey êraqîyekan bête dî û wilatî xoman le ser esasêkî dîmukratî û edalet û aştî dûbare bîna bikeynewe, emrroş ke carêkî tir derfet le berdem gelekeman da rexsawe û detwanîn be sûd wergirtin le derhawêştekanî hel û merce nêwdewlletîyeke em rijême faşîye biruxênîn û gorrankarî le Êraq da bedî bênîn, asoyekî nwê û hawbeş le rûmanda kirawetewe û debêt dest bigrîn be hetmiyetî becê hênanî ew kare nîştimanîyewe û pirosey gorrîn le Êraq da bo berjewendî gelekeman han bideyn legell reçawkirdinî berjewendîye rewakanî delletanî dirawsêy îqlîmî û erebî û îslamî û komellgey nêwdewlletî. Lew pênawe da Kongrey giştî opozîsyonî Êraqî, ke zorbey her zorî hêz û layen û kesayetîyekanî opozîsyonî nîştimanî le xo girt û le rojanî 14 ta 16-î kanunî-yekem dîsemberî 2002 le Lenden le jêr diruşmî “le pênaw rizgarkirdinî Êraq û hênanedî dîmukrasî da” girêdira, prensîp û binerrete serekîyekanî kongrekan û kobûnewekanî rabirdûy opozîsyonî Êraqî dûpat dekatewe, be taybetî Kongrey Selahedîn 1992 û xîtabî siyasî wefdî opozîsyon le Waşinton (abî 2002) û lem pêwedangewe Kongre em birryar û raspardaney xwarewey pesend kird. Yekem: Rollî opozîsyonî Êraqî le pirosey gorrîn da Endamanî Kongre rollî opozîsyonî nîştimanî be hemû layen û rêkxirawe corawcorekanîyewe be pallpiştî cemawerî gelekeman le sertaserî Êraq da be rollêkî serekî û binerretî le pirosey gorran da dadenê û rollî opozîsyon le tewawî qonaxekanî pirosey çawerriwankirawî gorrîn da be corêk ke legell hel û mercî meydanî û tiwanakanî da biguncêt be rollêkî serekî dezanêt. Duwem: Ayindey Êraq û dîmukrasî Êraq dewlletêkî dîmukrasî perlemanî te‘edudî fîdirallî (bo hemû Êraq) debêt û bew pêyey çemkêkî însanî û şaristanî bo hawlatî bûn peyrrew dekat ke le ser binemay yeksanî û ciyanekirdinewe debêt be pêy netewe û ayîn û regez û aynza, Kongre cext dekatewe ke pêwîst e destûrêkî hemîşeyî bo wilat dabinirêt ke tiyay da pêkhatey gelî Êraq û ciyakirdinewey deselatekanî yasadanan û cêbecêkirdin û qeza reçaw bikirêt û îltizam be serwerîy yasa û parastinî mafekanî mirov û azadîye giştî û taybetîyekan bikirêt û rêz le damezrawekanî komellgey medenî bigîrêt. Sêyem: Îslam dînî dewllet e Ayînî îslam le negorrekanî (siwabit) î dewlletî Êraq e û hukmekanî şerî‘ey îslamî serçaweyekî serekî ye le serçawekanî yasadanan û Kongre tekîd dekat ke debê hîdayet le beha pîrozekan û prensîpe lêburde û xêrxwazîyekanî werbigîrê û rêbazu tealîmekanî le biwarekanî roşinbîrî û rageyandin û bernamey xwêndin û perwerde da reçaw bikirêt, legell rêzgirtinî hemû ayîne asmanîyekan û bawerrekanî dîke. Çiwarem: Dewlletî yasa Kongre hawdeng bû ke rêge be ajawe û halatî tollesendinewey kwêrane û hîç şêwazêkî dîkey serpêçî û yasaşkênî nedirêt ke biyewêt xoy be ser keş û heway Êraqî ayinde da bisepênê ca îtir be her birrûbiyanûyek bêt. Pêwîst e le rêgey yasa û edaletewe halletekan bixirêne berdem deselatî dadwerî û dadga nêwxoyî û nêwdewlletîye peywenddarekan, lewê da gişt pêşêlkarîye medenîyekanî wek zewtkirdinî maf û mullk û mall û ew tawane cînay û siyasîyaney be bellgey selmênira û pişt estûrin, dadgayî bikirên le waneş tawanekanî paktawî regezî û kokujî û tawanekanî ceng. Pêncem: Birryarî siyasî Kongre birryarî da ke pêwîst e hemû pêkhatekanî gelî Êraq be ereb û kurd û turkman û aşûrî û kildan û ewanî dîkewe be musillmanî şî‘e û sunne û mesîhîyekan û êzdîyekan û hemû bawerrdaranî ayîne asmanîyekanî dîkewe le birryarî siyasî da beşdar bin. Şeşem: Retkirdinewey her destêwerdanêk ke biyewêt îradey gelî Êraq le gorrîn da pêşêl bikat Kongre dawa le komellgey nêwdewlletî dekat, piştîwanî gelî Êraq bêt bo rizgarbûn le rijêmî dîktatorî û le heman kat da Kongre her şêwazêkî wek dagîrkarî û hukmî eskerî nêwxoyî ya derekî û wîsayetî (wisaye) î derekî û destêwerdanî îqlîmî ret dekatewe û tekîd le ser rêzgirtinî serwerî Êraq û serbexoyî dewllete dirawsêkan û peyrrewkirdinî prensîpekanî dirawsêtî baş û hawkarî îqlîmî û destêwernedan le karubarî xellkî dîke û pabendbûn be tewawî ew bellên û peymanname û rêkkewtinane dekatewe ke komellgey nêwdewlletî pesendî kirdûn, le serûy hemûşiyanewe mîsaqî Netewe Yekgirtuwekan û carrnamey cîhanîy mafekanî mirov û hemû gelalle name û rêkkewtine nêwdewlletîyekanî taybet bem mafane, herweha pabendbûn be mîsaqî Komkarî erebî û rêkxirawî Kongrey îslamî. Hewtem: Kêşey tayfî û sirrînewey asewarekanî Şî‘e le Êraq da wek tayfekanî dîke be dirêjayî mawey rabirdû be taybet le serdemî em rijême da tûşî çewsandinewe û tundutîjî û serkutkarî û ciyakirdinewe bûn û mafe medenî û siyasî û aborî û keltûrî û komelayetî û medenîyekaniyan zewt kiran û emeş hawsengî komelayetî wilatekey têkda û yekêtî nîştimanîy û giyanî birayetî û lêburdeyî xiste berdem metirsî gewre û buwe hoy bala destî siyasetî serkutkarî û dezga gelî taybetî û şêwazekanî le xişte birdin û diro û çaw raw le pênawî sepandinî deselat be ser komellgey Êraqî da be hemû reng û netewekanîyewe û be zorîney şî‘eyşewe, be meş gelî Êraq yek le giringtirîn fakterekanî parêzrawî û bergirî le destda û bew coreş firset rexsa bo siyasetgelî dîktatorî û regezperistî tayfî ke zefer be hemû êraqîyekan bibat. Le ber ewe Kongre lew bawerre da ye ke pêwîst e herçî zûtir e hemû siyasetekanî tayfî bisirrdirêtewe û heram bikirêt û, mafe rewa û zewtkirawekanî şî‘e riyayet bikirêt Kongre siyasetî dizêwî destdirêjî bo ser merceiyet û hewze îlmîyekan û destêwerdan le karubarî û ablluqe danî û sepandinî xellkanêk be zor be seriyan da îdane dekat û herweha kuştinî mercee aynîye gewrekan û kes û kariyan û zana aynîyekan û girtin û eşkencedanî hezaranî dîke ke lêre da derfetî nawhênaniyan nîye îdane dekat. Herweha Kongre siyasetekanî destdirêjî bo ser mafî damezra û hewze dînîyekanî Necefî eşref û şare pîrozekanî dîke û rûxandinî mizgewt û Huseynîyekan û mellbende îslamîyekan û kitêbxanekan û qedexekirdinî kitêb û sansordanan û rêgirtin û qedexekirdinî rêwirresmî şeayire mezehebîyekan û rûxandinî gund û şaroçkekanî şî‘enişîn û rûxandinî mallekaniyan û wişk kirdinewey nawçekaniyan û ragiwastiniyan û hênanî hawlatî wilatanî dîke û nîştecêkirdiniyan lecêy eman û guman xiste ser întîmay erebiyane û Êraqiyaney şî‘ey erebî Êraq û, derkirdinî şî‘e Êraqîye naerebekan û nikollî kirdin le Êraqêtîyan û lê sendinewey regeznamey Êraqîyan û destbeserkirdinî rollekaniyan û dest beseragirtinî mullk û malliyan îdane dekat. Kongre way debînê ke destûrî nwêy Êraq pêwîst e dûbare nebûnewey em core karane û parastinî hemû pêkhatey gelî Êraq bebê ciyawazî misoger bikat. Heştem: Sebaret be şalawekanî komellkujî û Hellebce û enfal Kongre hemû ew zullm û regezperistî û paktawkirdinî nejadiye mehkûm dekat ke rijêmî Êraq be şêweyekî bername bo danira û derheq be gelî Kurdistanî Êraq encamî dawe be taybetîş cînosayd û şalawe bednawekanî enfal, ke 180 hezar hawlatî tê da berkewtûn û heşt hezar le barzanîyekan û pênc hezar le feylîyekan û pênc hezar kes le danîştwanî Hellebce û rûxandinî hezaran gund û şaroçkeke, ke buwe hoy hejandinî wîjdanî cîhan. Kongre le katêk da daway kotayîhênan bem dananî astêk bo siyasete çepelle dekat, tekîdîş le ser pêwîstî aşkirakirdinî çarenûsî qurbanîyekan dekatewe legell rêz lênan lew qurbaniyane û qerebû kirdinewey kes û kariyan û bînakirdinewey ew şwênaney ke têkidiraw in û dadgayîkirdinî ewaney em tawananeyan encamdawe le dadga nêwdewlletîyekan da. Noyem: Sebaret be ragiwastin û paktawkirdinî nejadî û gorrînî waqîy neteweyî Kongre hemû corekanî ragiwastinî be zor û paktawkirdinî nejadî û bekarhênanî çekî kîmiyayî û gorrînî nasnamey neteweyî be zor mehkûm dekat be taybetîş gorrînî waqî qewmî nawçekanî Kerkûk û Mexmûr û Xaneqîn û Şengar û Şêxan û Zimar û Mendelî û htd. Herweha Kongre dawa dekat asewarekanî ew siyasete nemênêt û binbirr bikirêt bem şêweye: A) Gerranewey ragiwêzirawekan bo ser mall û şwênî xoyan û gêrranewey hemû core kel û pel û mall û mullkiyan û qerebûkirdinewey ziyanekaniyan. B) Gêrranewey ew kesaney ke rijêm hênawniyete cêgay ragiwêzirawekan bo cêgakanî pêşûyan. C) Gerranewey kurde feylîyekan û hemû ew êraqîyaney ke rijêm be biyanûy reçellek êranîyewe bo derewey wilat dûrî xistunetewe û be şêweyekî narrewa mafî hawlatîyetî lê sendunetewe û misoger kirdinewey nasnamey êraqîyetî boyan û gêrranewey mall û mullkiyan û aşkirakirdinî çarenûsî bê serûşwên û gîrawe feylîyekan le sallî 1980 we û qerebûkirdineweyan. D) Hellweşandinewey hemû ew îcraate îdariyaney ke rijêm le sallî 1968 we kirudêtî ke be amancî gorrînî waqî dîmogirafî Kurdistanî Êraq buwe. Deyem: Fîdirallîyet û çareserkirdinî dozî kurd Le katî dîrasekirdinî kêşey kurd û rêgay çareserkirdinî da Kongre tekîdî le ser fireyî û hemerengî komellgay Êraqî le rûy neteweyî û mezhebî û siyasî kirdewe û cextîşî le ser pitewkirdinî yekêtî nîştimanî arezumendane û bedîhênanî le rêy yeksanî tewaw le nêwan hemû hawlatiyan da kirdewe be reçawkirdinî birryar û raspardekanî Kongrey Selahedîn û kobûnewekanî dwatirî opozîsyon le Waşinton le mangî abî emsall 2002 da û tebenîkirdinî Encûmenî Nîştimanîy Kurdistanî Êraq bo pirojeyekî fîdirallî kamill le danîştinî rojî 7-î tişrînî-duwemî sallî 2002-î da. Kongre rêzî xoy bo gelî Kurdistan xwast û îradey azadaney gelî Kurdistan radegeyenêt le hellbijardinî şêwaz û sîxey guncaw bo şeraketî xoy legell rollekanî yek nîştiman. Kongre le ser ezmûnekanî sîstimî fîdirallî giftugoy kird û be şêwazêkî guncawî bo hukimkirdinî Êraq le qellem da û pêwîst e piştî pê bestirêt wek binemayek bo çaresekirdinî kêşey kurd le çiwarçêwey damezrawe destûrîyekanî Êraq da diway lenawbirdinî rijêmî Sedamî dîktatorî û gorrankarî çawerrwankiraw le Êraq da, lem bareyeşewe Kongre yekparçeyî Êraq û pêkewejiyan le nêwan netewekanî da le ser binemay yekêtî arezumendane dûpat dekatewe, herweha Kongre cext le ser xwaste rewa û adîlekanî gelî Kurdistan dekatewe legell binbirrkirdinî hemû diyardekanî çewsandinewe û serkutkirdin le ser binemay yasay nêwdewlletî ke mafî diyarîkirdinî çarenûsî pê dedat û tekîdîş le ser birayetî û yekêtî û şeraket dekat le yek nîştiman da. Yazdeyem: Mafekanî turkman Kongre basî lew regezperistî û paktawkirdine nejadiyey û tafî û ragiwastine kird ke derheq be turkman kirawe, le ber ewe tekîdî le ser giringî misogerkirdinî yeksanî legell ewanî tir da dekatewew îqrarî le maf neteweyî û roşinbîrî û îdariye rewakaniyan le çiwarçêwey sîxeyekî yasayî diyarîkiraw da dekat û le rûy destûrîşewe em mafane deparêzrê. Diwanzeyem: Mafekanî aşûrîyekan Kongre dîrasetî ew zullm û çewsandinewey kird ke aşûrîyekan dûçarî bûn û cextî le ser zeruretî yeksaniyan legell ewanî tir da kirdewe legell zeruretî mumaresekirdinî mafe neteweyî û roşinbîrî û îdarîye rewakaniyan le çiwarçêwey sîxeyekî yasayî diyarîkiraw da û le rûy destûrîşewe ew mafane deparêzirê. Siyanzeyem: Nehametî horrekanî Êraq Nawçey horrekan dûçarî nehametî miroyî û jîngeyî buwenetewe ke buwete hoy wişkbûnî nawçeyekî zor le rûberekey û têk û pêkdadanî nawçeke û birrînî serçawey jiyan lew nawçane û ragiwastinî deyan hezar le rollekanî, boye pêwîst e ke giringîyekî taybetî pê bidirêt le layen hikumetî nwêy Êraqewe bo gerranewey danîştwanekey bo nawçekaniyan legell û qerebûkirdinewe û hawkarî pêwîst bo bujandinewey nawçeke û dabînkirdinî serçawey jiyanêkî bextewer bo rollekanî. Çiwardeyem: Sebaret yasa û birryare narrewakan Kongre daway sirrkirdin û hellweşandinewey hemû ew yasa û birryare regezperistiyane dekat ke rijêm benarrewa dijî kurd û turkman û aşûrî û ew birryare tayfiyaney dijî şî‘e derîkirduwe. Panzeyem: Sebaret ezmûnî herêmî Kurdistanî Êraq Kongre ezmûnî herêmî Kurdistanî Êraq le serbestî û dîmukratî û bûniyadinanewe da berz denirxênêt, emeş bellgey ew waqiye bellgedare ye ke Êraqîyekan detwanin sazinde bin eger azad bin le dîktatoriyet. Kongre wa debînêt ke dekrêt sûd lew ezmûne serkewtuwe werbigîrêt bew sîfetey ke hengawêkî pêşkewtuwe le ser rêgay werçerxanî dîmukratî çawerrwankiraw le Êraq da û, çareserkirdinî kêşekan le rêgay giftugoy birayane û binbirrkirdinî tundûtîjî le karî siyasîy da. Kongre dawa dekat piştgîrî ew ezmûne bikirêt û biparêzrêt, mamelle legell damezrawe yasayiye hellbijêrdirawekanî bikirêt heta destûrî dîmukratî fîdirallî taze bo wilat daderrêjirêt be herêmî Kurdistanî Êraqîşewe û hêzekanî pêşmerge legell supay Êraq da têkell dekirênewe. Şanzeyem: Dam û dezgay asayiş Kongre serkoney siyasetî rijêm dekat le kuştinî be komellî hezaran êraqî û tesfiyekirdinî cesteyî hezareha hawlatiyan û kadirî siyasî û zanistî û efseranî supa, Kongre cext dekatewe le ser pêwîstî aşkirakirdinî rastîyekanî her tawanêk û dadgayîkirdinî berpirsanî be şêweyekî yasayî. Kongre be pêwîstî dezanêt ew dezga serkutkerane hellbiweşênêtewe ke rijêm bo toqandin û serkutkirdinî hawlatiyan dirustî kirdibûn û dezgay asayiş ser le nwê dirust bikirêtewe û be corêk bêt ke hurmetî yasa û mafekanî hawlatêtî û mafî mirov û asayişî wilat be pêy yasa bigrêt. Hevdeyem: Supaw hêze çekdarekan Amadebuwan cextiyan kirdewe le ser bayexî ser le nwê bunyadinanewey damezrawe serbazî û hêze çekdarekan be şêweyekî pîşeyî û nîştimanî rêk û pêk û dûr le milmilanêy û be mîlîtarîkirdinî komellge û milmilanîy nawxoyî û siyasetî regezperistî û tayfî, nehêştinî pirojey perepêdanî çekî kokuj û her çekêk ke le ser astî nêwdewlletî qedexekira bê û, dûrxistinewey supa le kirdiwey serkutkarî nawxo û pêrrewî dujminkaraney derekî û, sinûrdarkirdinî erkî supa bo bergirîkirdinî le wilat û bûnyadinanewey. Hejdeyem: Barî aborî û nehêştinî paşmawey dû şerrî kawilkar Kongre berpirsiyarêtî daruxanî aborî û guzeran û asayiş û komelayetî ke Êraqî têy da dejî be hoy kawilkarî û koçpêkirdinî milyoneha le rollekanî le ser zêdî xoyan bo henderan xiste estoy rijêmî êsta, daway le dewlletanî bira û dost kird, ke mîwandariyan biken û penage û asankariyan pêşkeş biken. Herweha Kongre berpirsiyariyetî exlaqî û yasayî mêjûyî xiste ser rijêmî êsta ke dû şerrî le dijî dû hawsêy xoy (Êran û Kuwêt) berpa kird, daway hawkarî legell herdû dewlletî dirawsê dekat bo azadkirdinî dîl û dest beseragîrawekan û kotayî hênan bew paşmawe kellekebuwey ew qonaxe şazew û rêge nedan be bekarhênanî xakî Êraq bo dujmindarî bo ser dewlletanî dîke. Kongre berpirsiyarîy yekemî sepandinî siza û gemaroy ser Êraqî xiste estoy rijêmî êsta û dawa le komellgey nêwdewlletî û wilatanî dirawsê dekat hawkar bin legellî da bo kotayîhênan bem barudoxe şazey ke têy da dejî û bepêy birryarekanî Netewe Yekgirtuwekan hemû şwênewarekanî ew prose yasayiyane nehêllirêt ta û Êraq bigerrêtewe bo naw komellgey nêwdewlletî û herêmayetî û be aştî û asayiş bijî. Herweha dawa le komellgey nêwdewlletî û dewlletanî bira û dost û damezrawe nîwdewlletiyekan dekat le mawey qonaxî giwastinewe da hawkarî Êraq biken le çiwarçêwey projeyekî sertaserî hemelayene û fire biwarda bo ewey ew qonaxe karesatawiye be ser biçê, bo emeş cextî le ser pêwîstî em rêwişwêne be pelane kirdewe. — Kokirdinewey birrêkî gewrey dahatî Êraqî û nêwdewlletî û herêmayetî — Rêge be Êraq bidirê ke tiwanay henardey newtî bigate ewperrî ast. — Danustand kirdin legell ew layenaney qerziyan le ser Êraqe bo çareserkirdinî kîşey qerzdarî û ew qereboyey le ser Êraq kellekebuwe. — Dawa le komellgey nêwdewlletî bikirêt be taybetî dewlletanî dost ke resîdî blokkirawî Êraq le derewe azad bikirê û yarmetîman biden bo aşkirakirdinî samanî Sedam û ewaney legellî da têwegilaw in û kompanya û hemî û rasteqîyekanî û hisabe kirawekaniyan le hemû wilatan û destiyan be ser da bigîrê wek beşêk le mullkî giştî gelî Êraq. — Herweha Kongre dawa le hukmî nwê dekat, ke dûbare dîrasetî hemû rêkkewtine bazirganî û aborî û petroliyekan bikatewe ke Êraq le sallî 1990 ewe legell kompaniya û dewlletan da morî kirdûn ke ta çend barî yasayî û berjewendî Êraq le girêdanî da reçawkirawe. — Kongre dawa le hukmî nwê dekat be şêweyekî taybetî hawkarî legell Êran û Kuwêt da bikat bo azadkirdinî dîl û destbeserdagîrawekan le herdûla û kotayîhênan be hemû şiwêneware silbîyekan. Nozdeyem: Bernamey newt beramber xorak Kongre way debînê ke pêwîst e parêzgarî le bernamey “newt beramber be xorak” bikirê ke xwardin û derman û ser le nwê bunyadinanewey jêrxanî aborî bo gelî Êraq desteber dekat û, kar bikirê bo çareserkirdinî layene silbîyekanî bernameke heta ew katey çaw dexşênirêtewe be birryare peywendarekanî Encumenî Asayiş da û bernameyekî rêkupêk le layen hukmî nwê we daderêjirê û jiyanêkî serberzane bo gel be taybetî çîne hejarekan û ewaney dahatiyan sinurdar e ferahem dekat, herweha debê bernamey geşepêdan û dabeşkirdinî yeksanî dahat le hemû herêmekanî sertaserî wilat da b ewirdî hisabî bo bikirê. Bîsitem: Yasayekî taze bo nasnamey regezî Amadebuwanî Kongre birryariyan da ke pêwîst e yaseyekî miroyî û hawçerx û taze bo nasnamey regezî derbikirêt û, hemû polênkirdinekanî hawlatî û ew kelênaney be kar dehênran bo mehrûmkirdinî deyan hezar le hawlatiyanî êraqî le nasnamey nîştimaniyan ret bikirêtewe û hewll bidirê diway nemanî rijêmî êsta hemûyan bigerênewe bo Êraq û çareserî ew şwêneware silbiye kellekebuwane bikirê ke le akamî em siyasete namiroyiyewe kewtotewe. Bîst û yekem: Asankirdinî gerranewey koçkirdwan û koçpêkirawan û penaberanî Êraqî Amadebuwan birryariyan da ke pêwîst e deselatekanî qonaxî întîqallî dest becê asankarî bikat bo milyoneha koçber û penaberî îraqî le tarawge cora û corekan û ew pêdawîstiyaneyan bo desteber bikat ke geraneweyan legell xêzanekaniyan da asan dekat û bo ewey beşdarî le bunyadenewey wilatekeyan biken, herweha mullk û mallî xoyan bo bigêrêtewe û qerebûy ew ziyananeş bikirêtewe ke lêyan kewtuwe. Bîst û duwem: Rollî kefaetî ekadîmî û zanistî Amadebuwan dawayan kird ke pêwîst e komelle ekadîmîyekanî û pisporan û zanayanî Êraqî ewaney astêkî berzî kefaet wastî zanistiyan heye şarezayî xoyan bixene xizmetî planekanî bujanewey êsta û ayindeyî le hemû biwarekanda û lew katewey rijêmî êsta namênê. Kongre silawî bo şehîdanî serbestî Êraq nard û piştgîrî xoşî bo deyan hezar bend û gîrawe siyasîyekan û kesukariyan dûpat kirdewe ke çendîn sall e lew dî û dîwarekanî bendîxanekanî rijêmewe jiyan be ser deben. Herweha Kongre silawî bo kesûkarman nard le nawe û le her goşeyek û biste zemînêkî Êraq da û şanazî be giyanî fîdakariyan dekat ke be mehzeley rapirsî û şanogerî berdanî gîrawekan û firt û fêllekanî dîkey rijêm gallteyan dêt dillniyaş bin rizgarbûnî gelî Êraq zor nizîk botewe.